Keegan sjöundi fastráðni stjórinn á ellefu árum

Kevin Keegan varð í dag sjöundi knattspyrnustjóri Newcastle sem er fastráðinn hjá félaginu á undanförnum ellefu árum.

Síðan að Keegan hætti árið 1997 eftir fimm ára veru hjá félaginu hafa eftirtaldir menn verið fullráðnir knattspyrnustjórar hjá Newcastle:

Kenny Dalglish: janúar 1997 - ágúst 1998

Ruud Gullit: ágúst 1998 - ágúst 1999

Bobby Robson: september 1999 - ágúst 2004

Graeme Souness: september 2004 - febrúar 2006

Glenn Roeder: febrúar 2006 - maí 2007

Sam Allardyce: maí 2007 - janúar 2008

Auk þeirra hafa fjórir menn gegnt stöðu knattspyrnustjóra tímabundið, þar af Nigel Pearson tvívegis á undanförnu ári, bæði áður en Allardyce var ráðinn og eftir að hann var rekinn.

Ráðningin kemur talsvert á óvart þar sem Keegan hefur ekki verið verið í stjórabransanum síðan hann hætti hjá Manchester City í mars árið 2005.

Á þeim tíma hefur hann rekið knattspyrnuskóla í Glasgow og sagði í viðtali við BBC í október síðastliðnum að ólíklegt væri að hann myndi taka við stjórn knattspyrnuliðs aftur.

„Líf mitt hefur tekið breytta stefnu. Það er aldrei að vita enda fæ ég enn tilboð um að taka að mér þessi störf á nýjan leik en ég tók ákvörðun um að gera eitthvað annað við líf mitt."

„Ég hef ekki einu sinni horft á fótboltaleik með berum augum síðan ég stýrði Manchester City í síðasta skipti og ég man ekki einu sinni hver andstæðingurinn var."

Keegan er einn þekktasti knattspyrnumanna Englands á 20. öldinni. Hann lék til að mynda með Liverpool og Hamburg og varð fjórum sinnum deildarmeistari, einu sinni Evrópumeistari og tvívegis kjörinn knattspyrnumaður ársins í Evrópu. Hann lék einnig 63 landsleiki á sínum ferli.

Árið 1992 tók hann svo við Newcastle og var þar við stjórnvölinn í fimm stormasöm ár en eftir það stýrði hann Fulham, enska landsliðinu og Manchester City.

Keegan var orðaður við Newcastle í sumar eftir að Mike Ashley keypti félagið sem yfirmaður knattspyrnumála. Keegan tók fyrir slíka ráðningu á meðan Allardyce væri þar við störf.

„Það er glórulaust að ráða fyrst Sam Allardyce og svo einhvern sem gæti talinn vera ógnun við hans starf. Það bara virkar ekki," sagði Keegan.