Pato skoraði í sínum fyrsta leik

Brasilíska undrabarnið Pato hjá AC Milan skoraði í gær í sínum fyrsta leik fyrir liðið þegar það burstaði Napoli 5-2. Hann uppskar hrós frá þjálfarar sínum Carlo Ancelotti.

Það var gamli refurinn Ronaldo sem opnaði markareikninginn hjá Milan í gær með tveimur mörkum og Ancelotti var ekki síður ánægður með það. "Ronaldo var frábær, ekki síst fyrir þær sakir að hann er ekki búinn að vera nema tíu daga við æfingar. Hann sannaði þarna hvað hann er góður leikmaður því hann á nokkuð í land með að komast í toppform. Þetta var frábært kvöld og Pato toppaði það með því að standa undir öllu fjaðrafokinu sem hefur verið í kring um hann," sagði þjálfarinn.

"Pato er mjög fljótur og leikinn og svo er hann líka þroskaður. Frumraun hans var ekki ósvipuð frumraun Kaka á sínum tíma og tilfinningin var sú sama. Það er mjög ánægjulegt að stuðningsmennirnir skuli hafa tekið honum vel," sagði Ancelotti, en hans menn í Milan eiga mikið verk fyrir höndum enda eru þeir 25 stigum á eftir grönnum sínum í Inter í deildinni.