Stendur sterkt og á 140 milljónir punda hjá Nýja Kaupþingi

Bakkavör á 140 milljónir punda hjá Nýja Kaupþingi banka og stendur sterkt samkvæmt tilkynningu frá stjórn Bakkavör Group. Þar kemur fram að rekstur félagsins sé arðbær, sjóðsmyndun sterk og félagið njóti góðra tengsla við bæði viðskiptavini og birgja og viðskiptakjör milli aðila séu eðlileg.

,,Eins og tilkynnt var í 9 mánaða uppgjöri félagsins í október síðastliðnum þá á félagið umtalsverða innstæðu hjá Nýja Kaupþingi banka. Innstæðan er að fullu tryggð af Tryggingasjóði innstæðueigenda og fjárfesta á Íslandi auk þess að

forsætisráðuneytið og Seðlabanki Íslands hafa staðfest að svo sé."

Félagið hefur getað leyst út hluta innstæðunnar en stjórn félagsins er fullviss að þær 140 milljónir punda sem eftir eru fáist leystar út að fullu í pundum þó ekki sé ljóst hvenær það verði.

,,Í ljósi þessa hefur Bakkavör haft frumkvæði að viðræðum við aðila að alþjóðlegu sambankaláni félagsins og hefur Bakkavör fengið ráðgjafa félagsins til langs tíma, NM Rothschild & Sons Limited (NMR), til þess að vera ráðgefandi í þeim viðræðum."