Álverið í Straumsvík heldur sínu striki í framkvæmdum

Ólafur Teitur Guðnason fjölmiðlafulltrúi álversins í Straumsvík segir að álverið muni halda sínu striki hvað framkvæmdir varðar á næsta ári. Frétt Fréttablaðsins í dag um að hætt hafi verið við stækkun álversins sé einfaldlega röng.

"Við munum eitthvað hnika til tímasetningum en ekkert hefur breyst hvað áform okkar um framkvæmdir á næsta ári varðar," segir Ólafur Teitur.

Eins og áður hefur komið fram í fréttum felst þessi stækkun álversins í því að skipt verður um straumbreyta, spennu- og rafbúnað og fleira í kerskálum álversins. Við það mun framleiðslan aukast talsvert og framkvæmdirnar kalla einnig á aukin raforkukaup frá Landsvirkjun.