Alex ítrekar að hann vill komast burt

Varnarmaðurinn Alex hefur ítrekað það að vilji hans sé að yfirgefa Chelsea í janúar. Sá brasilíski segist vilja finna nýtt lið en honum hefur ekki tekist að festa sig í sessi á Stamford Bridge.

Chelsea neitaði því á dögunum að Alex hefði farið fram á sölu en leikmaðurinn fer ekki leynt með það hver vilji hans sé. Panathinaikos og PSV Eindhoven fylgjast spennt með gangi mála.

„Ég veit að það er ekki mjög hentugur tími að skipta um lið á miðju tímabili en ég verð að hugsa um mína hagsmuni," sagði Alex sem er að berjast við John Terry og Ricardo Carvalho um sæti í liði Chelsea. „Þetta er mjög erfið staða fyrir mig. Chelsea hefur eitt allra besta miðvarðapar heims og hvorugur þeirra gerir mistök."