Yakubu sleit hásin - Saha meiddist líka

Framherjinn Yakubu hjá Everton getur ekki spilað meira með liði sínu á leiktíðinni. Hann sleit hásin eftir aðeins tíu mínútna leik gegn Tottenham í dag.

Varamaður Yakubu, Louis Saha, meiddist líka í leiknum þegar hann tognaði enn og aftur í aftanverðu læri. Óvíst er hversu lengi hann verður frá keppni, en þeir félagar eru því komnir varanlega á meiðslalistann eins og James Vaughan.

Það er því fátt um fína drætti í framlínu Everton á næstunni og mikið má vera ef félagið þarf ekki að versla sér framherja í janúar.

Þar fyrir utan hefur verið ágætis gangur á liði Everton að undanförnu og 1-0 sigur liðsins á White Hart Lane í dag þýddi að það er nú komið í sjöunda sæti deildarinnar.