Moyes ánægður með sigur í 300. leiknum

Leikmenn Everton færðu David Moyes góðan sigur í 300. leik hann sem stjóri liðsins þegar þeir lögðu Tottenham 1-0 á útivelli. Þetta var fyrsta tap Harry Redknapp á heimavelli síðan hann tók við Lundúnaliðinu.

"Við skulduðum stuðningsmönnunum sigur eftir tapið gegn Wigan og það tókst. Árangur Tottenham á heimavelli hefur verið frábær undanfarið og Harry hefur verið að gera góða hluti með liðið - svo við vissum að þetta yrði erfitt. Þeir pressuðu okkur stíft i lokin en við gerðum vel að halda fengnum hlut," sagði Moyes og hrósaði varnarmanninum Phil Jagielka í hástert.

"Phil Jagielka var enn eina ferðina stórkostlegur og ég er hæstánægður með þennan sigur," sagði Moyes og laug engu til um frammistöðu varnarmannsins sem var langbesti maður vallarins í dag.