Fyrsta tap Redknapp á heimavelli

Harry Redknapp mátti í dag þola sitt fyrsta tap á heimavelli síðan hann tók við Tottenham þegar lið hans tapaði 1-0 fyrir Everton.

Það var Steven Pienaar sem skoraði sigurmark Everton í upphafi síðari hálfleiks, en liðið missti framherjana Yakubu og Louis Saha báða meidda af velli.

Tottenham pressaði án afláts síðustu 20 mínútur leiksins en sóknarleikur liðsins var ekki upp á marga fiska án þeirra Jermaine Jenas og Luka Modric á miðjunni.

Mikið fjör var í leik Portsmouth og Blackburn á Fratton Park þar sem heimamenn höfðu sigur 3-2 í æsilegum leik.

Jermain Defoe og Peter Crouch komu Portsmouth í 2-0 á fjögurra mínútna kafla í upphafi síðari hálfleiks, en Matt Derbyshire og Tugay náðu að jafna fyrir Blackburn á fimm mínútna kafla um miðbik hálfleiksins.

Lánleysi Blackburn fullkomnaðist hinsvegar þegar varamaðurinn Sean Davies skoraði sigurmark Portsmouth á 79. mínútu.

Blackburn hefur ekki unnið sigur í síðustu níu leikjum sínum í deildinni og er sem fyrr í næstneðsta sæti með aðeins 13 stig.