Ferguson: Við vorum miklu betri

Sir Alex Ferguson var mjög ánægður með sína menn í Manchester United í dag þegar þeir unnu 1-0 útisigur á grönnum sínum í City í dag.

"Mér fannst við spila frábæran bolta í fyrri hálfleik og þá vorum við miklu betri. City sótti í sig veðrið þegar leið á síðari hálfleikinn og áttu nokkur skot á markið, en þeir ógnuðu okkur ekki sérstaklega. Það var ekki auðvelt að spila manni færri í lokin en mér fannst City aldrei gera sig líklegt til að skora" sagði Ferguson í samtali við Sky.

United-menn spiluðu 10 síðustu 20 mínúturnar í leiknum eftir að Cristiano Ronaldo lét reka sig af velli fyrir að blaka boltanum viljandi með höndunum.

"Hann reyndi að setja hendurnar fyrir sig til að hindra að boltinn færi í andlitið á sér og það má vera að stuggað hafi verið við honum. Honum fannst hann hafa heyrt í flautu dómarans, en ég nenni ekki að tala um það. Við gætum talað um þetta í allt kvöld," sagði Ferguson.