Wenger: Ég sá það ekki

Arsene Wenger var að vonum ánægður með 2-1 útisigur sinna manna í Arsenal á Chelsea á Stamford Bridge í dag.

Arsenal lenti undir 1-0 í leiknum á sjálfsmarki, en tvö mörk á þremur mínútum frá Hollendingnum Robin Van Persie í síðari hálfleik tryggðu Arsenal sætan sigur.

"Við erum mjög ánægðir með sigurinn því við höfðum tapað tveimur í röð. Þetta er frábært fyrir liðið og það sýndi mikinn karakter að koma til baka eftir að hafa lent undir. Við erum búnir að vinna Manchester United og svo Chelsea á útivelli og það sýnir hvað býr í þessu liði. Nú verðum við bara að vera auðmjúkir og einbeita okkur að næsta verkefni," sagði Wenger.

Sýnt þótti að Van Persie hefði verið rangstæður þegar hann skoraði jöfnunarmarkið, en Wenger gaf lítið fyrir það.

"Ég vil ekki skora rangstöðumörk en því miður sá ég þetta ekki nógu vel. Stundum falla svona atriði með manni - stundum á móti. Það vorum við sjálfir sem skoruðum eina markið sem við fengum á okkur í dag og mér fannst við hættulegri í sókninni," sagði Frakkinn.