Capello ánægður með fyrsta árið

Fabio Capello segist vera afar ánægður með þær framfarir sem enska landsliðið hefur tekið undir hans stjórn á undanförnu ári.

England vann í gær 2-1 sigur á Þýskalandi í Berlín í gær og segir Capello að það hafi verið frábær endir á hans fyrsta ári í starfi.

„Ég held að það sé ekki hægt að vera betri en þetta," sagði Capello eftir leikinn. „Við höfum spilað níu leiki á þessu ári og ég hef sagt að liðið hafi tekið skref fram á við eftir hvern einasta leik. Þetta er enn eitt skrefið en leikmenn spiluðu virkilega vel í leiknum."

Þetta var í fyrsta sinn sem Þýskaland tapaði í Berlín síðan liðið tapaði fyrir Brasilíu árið 1973.

„Við fengum mörk góð færi í leiknum og mér fannst leikmenn spila með miklu sjálfstrausti," sagði Capello og sagði það rangt að æfingaleikir sem þessir væru tilgangslausir. „Ég er mjög ánægður vegna þess að ég fékk að skoða nokkra leikmenn mjög vel sem ég þurfti að kynnast betur."