Gleymdu Evrópubikarnum í Þýskalandi

Ólafur Stefánsson og félagar hans í Ciudad Real virðast hafa verið nokkuð utan við sig eftir að þeir tryggðu sér Evrópumeistaratitilinn í handbolta á dögunum.

Ólafur varð fyrir því óláni að gleyma símanum sínum í flugvélinni á leið til Spánar, en það var ekki það eina. Í samtali við fréttastofu Stöðvar 2 sagði Ólafur liðið hafa gleymt sjálfum Evrópubikarnum í Þýskalandi.

Ólafur átti stórleik í úrslitaleiknum gegn Kiel í Þýskalandi og skoraði 12 mörk.

"Ætli megi ekki segja að þetta hafi verið óvæntasti titillinn sem ég hef unnið á ferlinum. Það er magnað að fara til Kiel og vinna svona stórleik," sagði Ólafur og bætti við að líklega hefði þetta verið einn af hans bestu leikjum á ferlinum ef tekið væri mið af mikilvægi leiksins.