Sir Alex í tveggja leikja bann

Sir Alex Ferguson, stjóri Manchester United, hefur verið dæmdur í tveggja leikja bann og sektaður um 10 þúsund pund. Ferguson óð inn á völlinn til að ræða við Mike Dean dómara eftir að United vann Hull þann 1. nóvember.

Bannið tekur gildi þann 2. desember og fær Ferguson ekki að stýra United af hliðarlínunni í bikarleik gegn Blackburn og deildarleik gegn Sunderland.

Þegar Ferguson fékk ákæruna í hendur þann 7. nóvember lét hann hafa eftir sér að þetta kæmi sér ekki á óvart, enska knattspyrnusambandinu leiddist ekki að senda sér bréf.

Ferguson var sérlega óánægður með að Dean hafi ekki rekið Michael Turner af velli í umræddum leik. Turner var kominn með gult spjald þegar hann braut illa á Michael Carric í leiknum.