Derby áfram á marki í uppbótartíma

Derby County er komið í undanúrslit enska deildabikarsins. Liðið vann 1-0 útisigur á úrvalsdeildarliði Stoke í kvöld en eina markið í leiknum kom úr vítaspyrnu í uppbótartíma.

Dæmd var hendi innan teigs og Nathan Ellington fór á punktinn og skoraði. Leikurinn var annars einstaklega bragðdaufur og fátt um færi.

Á morgun ræðst hvaða lið fylgja Burnley og Derby í undanúrslitin. Manchester United tekur þá á móti Blackburn og Watford leikur gegn Tottenham. Báðir leikirnir verða í beinni á sportrásum Stöðvar 2.