Róbert hafði betur gegn Guðjóni Val

Róbert Gunnarsson og Guðjón Valur Sigurðsson mættust í þýsku úrvalsdeildinni í dag þegar að Gummersbach vann tveggja marka sigur á Rhein-Neckar Löwen, 29-27.

Leikið var á heimavelli Rhein-Neckar Löwen en Guðjón Valur lék lengi með Gummersbach og fór til Rhein-Neckar Löwen í sumar.

Báðir skoruðu þeir fjögur mörk í leiknum í dag.

Staðan í hálfleik var 15-13, Gummersbach í vil en leikurinn var í járnum lengst af í síðari hálfleik. Staðan var jöfn, 27-27, þegar innan við tvær mínútur voru til leiksloka en Gummersbach skoraði síðustu tvö mörk leiksins.

Tímabilið hefur ekki byrjað vel hjá Rhein-Neckar Löwen sem er í níunda sæti deildarinnar með tíu stig. Gummersbach er í fimmta sæti með fjórtán stig.