Fastir liðir eins og venjulega hjá Wenger

Arsene Wenger mun ekki breyta út af þeirri venju að stilla upp ungu liði Arsenal í leikjum liðsins í ensku deildarbikarkeppninni.

Arsenal mætir B-deildarliðinu Burnley í fjórðungsúrslitum keppninnar í kvöld en síðarnefnda liðið sló út Chelsea í síðustu umferð.

Jóhannes Karl Guðjónsson er á mála hjá Burnley og á ágætan möguleika á því að vera í byrjunarliðinu gegn Arsenal í kvöld. Hann hélt sæti sínu í byrjunarliðinu í tólf deildarleikjum í röð - allt þar til um síðustu helgi er hann kom inn á sem varamaður er Burnley vann 3-0 sigur á Derby.

Arsenal vann 3-0 sigur á Wigan í síðustu umferð og þar áður 6-0 sigur á Sheffield United. Wenger stillti upp ungum leikmönnum í þessum leikjum en þeir gætu verið enn yngri í kvöld þar sem að hann ætlar sér ekki að nota neinn af þeim leikmönnum sem voru í byrjunarliði Arsenal í leiknum gegn Chelsea um helgina.

„Þeir leikmenn sem voru á bekknum um helgina munu spila. Það þýðir að Silvestre mun spila og Fabianski líka. Aðrir leikmenn úr aðalliðinu munu einnig koma við sögu, til að mynda Vela og Bendtner," sagði Wenger.

„En við getum til dæmis ekki notað Djourou. Hann er meiddur og þá er Gallas líka tæpur. Kolo Toure og Emmanuel Eboue eru einnig frá vegna meiðsla."

Jay Simpson skoraði tvö marka Arsenal í 3-0 sigrinum á Wigan og hann mun líklega spila í kvöld, sem og hinn 16 ára gamli Jack Wilshere og Aaron Ramsey.

Leikurinn verður í beinni útsendingu á Stöð 2 Sporti í kvöld og hefst hún klukkan 19.40.