Kauphöllin fundar með SÍ um færeysku félögin

Þórður Friðjónsson forstjóri kauphallarinnar segir að óskað verði eftir fundi með Seðlabankanum í vikunni vegna þess vanda sem færeysku félögin eru komin í sökum nýju gjaldeyrisreglnanna.

Fá verður undanþágu fyrir færeysku félögin svo ekki sé ólöglegt að versla með hlutabréf þeirra í kauphöllinni en bréfin eru skráð, selt og keypt í dönskum krónum.

"Það getur ekki hafa verið markmiðið með lögunum að gera þessum félögum ómögulegt að vera áfram skráð í kauphöllina hér á landi," segir Þórður.

Félögin sem hér um ræðir eru Atlantic Petroleum, Atlantic Airways, Foroya Banki og Eik Banki.

Aðspurður um hvort hann hafi rætt þetta vandamál við færeysku félögin segir Þórður svo ekki vera enda málið nýkomið upp. Hinsvegar verði það alfarið í höndum hinna færeysku félaga hvort þau verði áfram í kauphöllinni eða hætti þar ef fyrrgreind undanþága fæst ekki.