Bankastjórar gömlu bankanna taparar ársins?

Sneyptir bankastjórar gömlu íslensku bankanna eru í stórum hópi manna sem tilnefndur hefur verið til verðlauna sem taparar ársins, samkvæmt frétt í viðskiptablaðinu Financial Times.

Í grein Financial Times um þá sem gætu verið útnefndir yfirborgaðir forstjórar ársins, segir að allir forráðamenn íslensku bankanna komi til greina. Þeir hafi ekki einungs sett fyrirtæki sín eftirminnilega á hausinn, heldur komist nálægt því að setja alla íslensku þjóðina á vonarvöl.

Hins vegar séu þessir snillingar langt í frá þeir einu sem eigi skilið að fá þennan titil, af nógu sé að taka í úrvali ofborgaðra forstjóra sem komu heiminum í þá úlfakreppu sem nú ríkir eftir fall fjármálaheimsins. Þar hafi margir gert í brækurnar.

Sir Fred Goowin sem var rekinn frá Konunglega Skotlandsbankanum er talinn líklegur til sigurs sem tapari ársins, en hann hafði litlar eitt þúsund og fimm hundruð milljónir í tekjur á árunum 2006 og 2007, en tókst að gera bankann sinn að littlu sem engu.

En bæði Sir Fred og íslensku bankastjórarnir fölna í samanburði við þá sem skitu hvað mest í hreiðrið sitt í bandarískum fjármálastofnunum, að mati the Financial Times. Þar er maður að nafni Daniel Mudd, sem hafði litla 2,9 milljarða króna í árslaun hjá Fannie Mae, Dick Syron sló hann út með litla 4,1 milljarða í árslaun hjá Freddie mack, en báðar þessar fjármálastofnanir fóru eftirminnilega á hausinn með slíku brambolti að heimurinn hefur ekki jafnað sig á eftir.