Björgvin ánægður með krónuna

Krónan styrktist um tæp 11 prósent í dag og stendur því í 204 stigum. Gengið hefur því styrkst um tæp 19 prósent frá því krónunni var fleytt í gær.

,,Ég var vongóður að þessi þróun myndi fara af stað eftir mikla yfirlegu með sérfræðingum úr bæði viðskiptaráðuneyti, Seðlabanka og víðar," sagði Björgvin G. Sigurðsson, viðskiptaráðherra, í kvöldfréttum Ríkisútvarpsins.

,,Ég er vongóður um að sú þróun haldi áfram á næstu vikum, gengið styrkist og staða okkar batni mjög verulega. Bæði hvað varðar verðbólga og aðra stöðu. Þetta er sú viðspyrna sem við þurfum að ná," sgði Björgvin.

Búist er við að krónan haldi áfram að styrkjast eftir helgi og eitthvað fram í næstu viku. Margir óttast að styrkingin sé þó tímabundin. Þegar höftin fari muni krónan lækka.

Einn Bandaríkjadalur kostar nú um 121 krónur í bönkunum viðskiptabönkunum þremur, evran kostar 153 krónur, breska pundið 176 og ein dönsk kostar tæpa 21 krónur íslenskar.