Bolton burstaði Sunderland

Fimm leikir fóru fram í ensku úrvalsdeildinni í dag. Bolton vann nokkuð óvæntan 4-1 stórsigur á Sunderland á útivelli þar sem Grétar Rafn Steinsson var í byrjunarliði gestanna og átti stóran þátt í einu markanna.

Djibril Cisse kom Sunderland yfir í leiknum en eftir það áttu heimamenn ekki möguleika og varð skelfilegur varnarleikur liðinu að falli í dag. Matthew Taylor jafnaði fyrir Bolton með skalla eftir undirbúning frá Grétari Rafni á 18. mínútu og skömmu síðar kom Gary Cahill liðinu yfir.

Johan Elmander skoraði svo tvívegis í síðari hálfleiknum og færði lærisveinum Roy Keane fimmta tapið í sex leikjum. Sunderland er nú á fallsvæðinu í deildinni.

Aston Villa missti af gullnu tækifæri til að komast í þriðja sæti deildarinnar þegar liðið gerði aðeins markalaust jafntefli við Fulham á heimavelli í bragðdaufum leik. Þetta var aðeins þriðja stigið sem Fulham nær í á útivelli alla leiktíðina.

Wigan vann góðan 2-1 sigur á West Brom þar sem Emmerson Boyce skoraði sigurmark Wigan fimm mínútum fyrir leikslok. Þetta var fyrsta mark kappans í þrjú ár. West Brom átti ágætan leik í dag og átti ef til vill eitthvað skilið út úr leiknum, en liðið situr enn á botninum og hefur ekki haft heppnina með sér.

Grannliðin Middlesbrough og Newcastle gerðu markalaust jafntefli á heimavelli Boro í fyrsta skipti í meira en 30 ár. Leikurinn var ekki mikið fyrir augað en stigið dugði þó til að koma lærisveinum Joe Kinnear upp af fallsvæðinu á kostnað granna þeirra í Sunderland.

Loks gerðu Stoke og Hull sanngjarnt 1-1 jafntefli í þokunni á Britannia vellinum í bragðdaufum leik þar sem segja má að Dean Windass hafi stolið senunni á varamannabekk Hull.

Windass fékk að líta gula spjaldið fyrir að trufla Rory Delap oftar en einu sinni þegar hann var að taka sín frægu löngu innköst.

Úrslitin í dag:

Sunderland 1 - 4 Bolton



1-0 D. Cissé ('11)

1-1 M. Taylor ('18)

1-2 G. Cahill ('21)

1-3 J. Elmander ('39)

1-4 J. Elmander ('55)

Wigan 2 - 1 West Brom

0-1 I. Miller ('47)

1-1 H. Camara ('61)

2-1 E. Boyce ('87)

Stoke 1 - 1 Hull

0-1 M. King ('44)

1-1 R. Fuller ('73, víti)

Aston Villa 0 - 0 Fulham



Middlesbrough 0 - 0 Newcastle