Sousa tekur við QPR

Paulo Sousa, fyrrum landsliðsmaður Portúgal í knattspyrnu, hefur verið ráðinn knattspyrnustjóri b-deildarliðsins QPR. Hann tekur við starfinu af Ian Dowie sem látinn var fara fyrir nokkru.

Sousa gerði garðinn frægan sem leikmaður með liðum á borð við Benfica, Sporting, Dortmund, Inter og Parma, en hinn 38 ára gamli Portúgali hefur litla sem enga reynslu af þjálfun.

Hann var nú síðast einn aðstoðarmanna Carlos Queiroz hjá portúgalska landsliðinu.

Sousa hefur þegar gefið það út að hann ætli að láta liðið spila sóknarknattspyrnu, en mikill metnaður er hjá QPR eftir að moldríkir eigendur eignuðust félagið fyrir nokkrum misserum.