Keane segir framtíðina óráðna

Roy Keane stjóri Sunderland segir óvissu ríkja með framtíð sína í stjórastólnum. Röð skelfilegra varnarmistaka varð til þess að liðið steinlá 4-1 heima fyrir Bolton í dag og er nú komið á fallsvæðið.

"Ég spyr sjálfan mig á hverjum degi hvort ég sé rétti maðurinn til að stýra Sunderland og í morgun var svarið já. Ég veit ekki hvað það verður í fyrramálið, en ef það verður nei - verð ég að skoða stöðu mína," sagði Keane heimspekilega í dag.

"Ég verð að vera heiðarlegur í mati mínu á stöðunni og hugsa um hvað Sunderland er fyrir bestu. Þetta snýst ekki um það hvað er mér fyrir bestu. Þegar öllu er á botninn hvolft, er það ég sem ber ábyrgð á gengi liðsins," sagði Írinn.

Sunderland tapaði í dag fimmta leik sínum af síðustu sex og er í 18. sæti deildarinnar.