Heiðar lék sinn fyrsta leik fyrir QPR

Heiðar Helguson spilaði sinn fyrsta leik fyrir QPR í ensku B-deildinni í dag þegar hann kom inn sem varamaður í hálfleik í markalausu jafntefli liðsins á útivelli gegn Crystal Palace.

Heiðar brenndi reyndar af skoti fyrir opnu marki í leiknum aðeins rúmri mínútu eftir að hann kom inn á, en hann er ekki í mikilli leikæfingu eftir að hafa spilað aðeins nokkrar mínútur með Bolton í úrvalsdeildinni í vetur.

Stigið þýðir að QPR er í áttunda sæti deildarinnar en Rangers-menn hafa ekki skorað mark á útivelli í 662 mínútur.

Wolves og Birmingham skildu jöfn 1-1 toppslag deildarinnar í dag. Wolves er í langefsta sæti í deildinni með 47 stig og Birmingham í öðru sæti með 41 stig, en Reading er í þriðja sæti með 34 stig og á leik til góða.

Jóhannes Karl Guðjónsson kom inn sem varamaður í lokin þegar lið hans Burnley vann 3-0 sigur á Derby. Burnley hefur 33 stig í fjórða sæti deildarinnar.