ILS lánaði 4,3 milljarða kr. í nóvember

Alls námu heildarútlán Íbúðalánasjóðs (ILS) rúmlega 4,3 milljörðum króna í nóvember. Þar af voru tæplega 3,2 milljarðar kr. vegna almennra lána og tæpir 1,1 milljarður kr. vegna leiguíbúðalána.

Í tilkynningu um málið seir að heildarútlán sjóðsins það sem af er árinu 2008 nema rúmum 53 milljörðum kr. samanborið við 62,7 milljarða kr. á fyrstu 11 mánuðum ársins 2007. Meðalútlán almennra lána námu um 10,9 milljónum króna í nóvember og drógust saman um 6,83% frá fyrra mánuði.

Heildarvelta íbúðabréfa í nóvember nam rúmum 44,7 milljörðum króna og dróst saman um 72% frá fyrra mánuði. Heildarvelta bréfanna nemur um 2.323 milljörðum króna það sem af er árinu 2008.

Þann 24. nóvember, tilkynnti matsfyrirtækið Standard & Poor's að það hefði lækkað lánshæfiseinkunn Íbúðalánasjóðs vegna langtímaskuldbindinga í erlendri mynt í 'BBB-' úr 'BBB'. Lánshæfieinkunn sjóðsins vegna langtímaskuldbindinga í íslenskum krónum var staðfest 'BBB'.