Aldrei færri nýskráningar á bílum, frá upphafi mælinga

Nýskráningar bíla í nóvember voru 123 og hafa þær ekki verið færri frá árinu 1995 eða frá því Hagstofan hóf að taka þessar tölur saman mánaðarlega. Þetta kemur fram í Hagvísum hagstofunnar. 12.231 bíll var nýskráður Frá janúar til nóvember á þessu ári og er það 42,3 prósenta fækkun frá sama tímabili í fyrra. Síðastliðna tólf mánuði hafa nýskráningar dregist saman um 38,7 prósent.

Kreditkortavelta heimila var 10,5% meiri í janúar-október 2008 en á sama tíma í fyrra, að því er segir í Hagvísum. „Debetkortavelta dróst saman um 2,6% á sama tíma. Samtals jókst innlend greiðslukortavelta heimila í janúar-október 2008 um 3,9%. Greiðslukortavelta Íslendinga erlendis jókst um 11,6% og erlend greiðslukortavelta hérlendis jókst um 16,3% í janúar-október 2008 miðað við sömu mánuði 2007," segir einnig um leið og bent er á að á sama tíma hækkaði vísitala neysluverðs án húsnæðis um 10,6% sem veldur 6,1% raunlækkun á innlendri greiðslukortaveltu.