Uppsagnir mun fleiri en sést á atvinnuleysistölum

Uppsagnir á starfsmönnum eru mun fleiri en sést á atvinnuleysistölum. Greining Glitnis bendir á að samkvæmt áætlun Vinnumálastofnunnar hefur útlendingum sem starfa á Íslandi fækkað um 5-6.000 frá því í júlí s.l.

Í Morgunkorni greiningarinnar segir að atvinnulausir eru nú á landinu öllu 6.245 samkvæmt skráningum á vinnumiðlunum í lok gærdags. Kemur þetta fram á vef Vinnumálastofnunar. Samkvæmt þessu hefur atvinnulausum fjölgað um 2.278 í nóvember en í lok síðasta mánaðar voru 3.967 skráðir atvinnulausir. Að meðaltali hafa 108 manns skráð sig á atvinnuleysisskrá hvern einasta dag mánaðarins.

Frá því að kreppan skall á í lok september hefur atvinnulausum fjölgað um 3.725 en í lok september voru 2.520 skráðir atvinnulausir. Útlendingum sem starfandi eru á íslenskum vinnumarkaði hefur fækkað umtalsvert undanfarið.

Áætlar Vinnumálastofnun að fækkunin nemi um 5-6 þúsund frá því í júlí á þessu ári. Ljóst er að uppsagnir fyrirtækja á vinnuafli eru því mun meiri en sést í atvinnuleysistölum.

Samkvæmt spá Seðlabankans verður atvinnuleysi 8% á næsta ári. Alþjóðagjaldeyrissjóðurinn er örlítið bjartsýnni og spáir því að atvinnuleysi á næsta ári verði 6%.