Tevez fór hamförum í sigri United

Argentínumaðurinn Carlos Tevez minnti heldur betur á sig í liði Manchester United í kvöld þegar hann átti þátt í öllum fimm mörkunum í 5-3 sigri liðsins á Blackburn í deildabikarnum.

Tevez hefur þurft að dúsa mikið á varamannabekknum hjá liðinu að undanförnu, en hann nýtti sér fjarveru þeirra Wayne Rooney og Dimitar Berbatov með áberandi hætti í kvöld.

Ekki liggur ljóst fyrir hvort Tevez skoraði þrjú eða fjögur mörk í leiknum, en talið er að fyrsta markið sem hann vildi eigna sér hafi verið sjálfsmark. Tvö af mörkunum sem Tevez skoraði voru gullfalleg, en hann lagði auk þess upp eitt mark fyrir Nani.

United náði 2-0 forystu áður en Benni McCarthy náði að minnka muninn fyrir Blackburn, en tvö mörk frá Teves komu United í 4-1. Mörk frá Matt Derbyshire og McCarthy náðu svo að hleypa lífi í leikinn á síðustu mínútunum, en Tevez kláraði dæmið með fimmta marki United í uppbótartíma.

Paul Scholes kom inn sem varamaður og spilaði sinn fyrsta leik með United síðan í september, en hann hafði átt við meiðsli að stríða. Aðeins tæplega 54,000 áhorfendur lögðu leið sína á Old Trafford í kvöld.

Tottenham vann tilþrifalítinn 2-1 útisigur á B-deildarliðinu Watford fyrir framan 16,500 áhorfendur í hinum leiknum í kvöld.

Roman Pavlyuchenko (víti) og varamaðurinn Darren Bent skoruðu mörk liðsins eftir að það hafði lent undir í leiknum.

Það eru því Manchester United, Tottenham, Burnley og Derby sem eru komin áfram í undanúrslit keppninnar. Dregið verður í undanúrslitin á laugardaginn.