Ríkisvíxlar runnu út

„Ríkinu hlýtur að vera létt fyrst þetta gekk svona vel," segir Jón Bjarki Bentsson, sérfræðingur í Greiningu Glitnis.

Ríkisvíxlar í tveimur flokkum voru seldir á föstudag fyrir yfir 70 milljarða.

Annar flokkurinn er með gjalddaga í janúar og þar seldust bréf fyrir 36,5 milljarða króna. Hinn er á gjalddaga í mars og þar seldist fyrir ríflega 37 milljarða króna.

„Þetta sýnir að menn vilja vera í stuttum pappírum um þessar mundir," segir Jón Bjarki. Hann hafði áður vakið máls á að dræm þátttaka í skuldabréfaútgáfum ríkisins hlyti að vera því áhyggjuefni. Einnig hafði hann bent á að yfir helmingur fjármagnseigendanna væri erlendur.

Skuldabréf fyrir um 100 milljarða króna voru á gjalddaga í mánuðinum. Bréf voru gefin út á móti, en aðeins var tekið tilboðum fyrir um þrjátíu milljarða króna. Við þetta þurfti að greiða út af viðskiptareikningum ríkisins hjá Seðlabankanum og lækkaði staðan þar úr ríflega 163 milljörðum króna í um 100, eftir því sem næst varð komist.

Um helmingur skuldabréfaútgáfunnar sem var á gjalddaga um miðjan mánuðinn var fólginn í lánum til svonefndra aðalmiðlara, en bankarnir þrír sem féllu voru í þeim hópi.

Björgvin Sighvatsson hjá alþjóða- og markaðssviði Seðlabanka Íslands benti á að á bak við verðbréfalánin væru tryggingar. „Sumar af þessum tryggingum eru öruggar, aðrar ekki. Þar sem gömlu bankarnir þrír gátu ekki skilað til baka bréfum sem þeir fengu lánuð í flokknum getur ríkissjóður gengið að tryggingunum sem bankarnir höfðu lagt fram."

Hann sagðist ekki geta sagt hversu langt tryggingarnar næðu upp í flokkinn en hluti þeirra er í formi óvarinna bankabréfa. Óvissa er um verðmæti þeirra. Fjármálaráðuneyti tjáir sig ekki um heimtur.

Seðlabanki og fjármálaráðuneyti hafa bent á að ríkissjóður eigi háar fjárhæðir í lausu fé og hafi því burði til að mæta stórum gjalddögum skuldabréfa. Bréf fyrir yfir 130 milljarða falla í gjalddaga á næsta rúma árinu, auk víxlanna í janúar og mars.