Veik króna hefur áhrif á vöruskiptin

Útflutningur dróst saman um fimmtung á milli október og nóvembermánaðar, reiknað á föstu gengi, samkvæmt nýjum tölum Hagstofu Íslands. Greining Glitnis segir breytinguna aðallega til komna vegna minna útflutningsverðmætis áls og sjávarafurða.

Samkvæmt bráðabirgðatölum Hagstofunnar fyrir nýliðinn mánuði nam útflutningur 43,2 milljörðum króna og innflutningur 40,8 milljörðum. Vöruskiptin voru því samkvæmt þessu hagstæð um 2,4 milljarða króna.

„Vegna mikilla hreyfinga á gengi krónunnar er samanburður á breytingum á milli mánaða erfiður,“ segir á vef Hagstofunnar. „Vísbendingar eru um minna verðmæti útfluttra sjávarafurða og áls en aukið verðmæti innfluttra hrá- og rekstrarvara miðað við október 2008,“ segir þar jafnframt.

„Verð á hrávörum hefur farið hríðlækkandi á heimsmarkaði undanfarna mánuði. Til að mynda er verð á áli nú komið undir 1.700 bandaríkjadali tonnið, en var ríflega 3.000 dalir fyrir tonnið um mitt ár. Á móti kemur raunar að bandaríkjadalur hefur styrkst verulega gagnvart ýmsum helstu gjaldmiðlum á þessu tímabili. Verð á sjávarafurðum okkar hefur hins vegar haldist hátt á heimsmarkaði, sem er nokkur bót í máli,“ segir Greining Glitnis og kveður í sjálfu sér ekki koma á óvart að dragi úr vöruskiptaafgangi eftir metafgang í október.

„Allar líkur eru hins vegar á að afgangur af vöruskiptum verði talsvert meiri en í nóvember að jafnaði á næstu misserum.“