Finna lausnir á lausafjárvanda

Einar Sigurðsson forstjóri Árvakurs, útgáfufélags Morgunblaðsins, segir að félagið sé núna að móta það vinnulag sem haft verður á því að leita eftir nýju hlutafé á næstu dögum og vikum. Eins og komið hefur fram í fréttum er staða félagins erfið. Unnið er að því nú að fá nýtt hlutafé inn í félagið og hefur töluverður hópur fólks sýnt félaginu áhuga.

„Við höfum haldið starfsfólki okkar upplýstu frá degi til dags. Í morgun var haldinn fimmti fundurinn síðan bankakrísan hófst. Þetta var svona almennur upplýsingafundur," segir Einar um fund með starfsmönnum sem haldinn var í morgun.

„Við erum nú að byrja að móta og finna lausnir á lausafjárvandanum og höfum náð ákveðnum áfanga í því," segir Einar.

Vísir hefur áður greint frá áhuga aðila á blaðinu og hefur Hreinn Loftsson, eigandi Birtíngs, m.a. lýst yfir áhuga sínum opinberlega.

„Það er töluvert af fólki sem hefur haft samband við okkur. Við munum hafa samband við alla þessa aðila í framhaldinu og þannig taka næstu skref."