Jón Arnór: Getum spilað miklu betur

"Þetta var kannski ekki besti körfubolti í heimi en þetta var fín spenna fyrir áhorfendur," sagði Jón Arnór Stefánsson sem skoraði 25 stig í 82-80 sigri KR á Grindavík í kvöld.

"Við getum spilað miklu betur og þeir líka, enda var Arnar Freyr Jónsson ekki með þeim í kvöld. Þetta eru tvö jöfn lið og það er alltaf hörkuleikir þegar þessi lið mætast," sagði Jón í samtali við Vísi.

KR-ingar eru nú einir á toppi Iceland Express deildarinnar með fullt hús stiga eftir sex umferðir, en þessi tvö lið voru taplaus fyrir leik kvöldsins.

"Við lögðum það upp að vinna þennan leik, því þetta er örugglega stærsti leikurinn okkar fyrir jól. Svo veit maður aldrei hvað gerist - hvort liðin bæti við sig útlendingum eða hvað. Eins og staðan er í dag eru þetta klárlega toppliðin í deildinni og því var mjög ánægjulegt að leggja Grindvíkinga í kvöld," sagði Jón Arnór.