United að krækja í tvo Serba

Manchester United er að klófesta serbneska leikmanninn Adem Ljajic en hann ferðaðist til Englands ásamt Zoran Tosic sem er að fara að gangast undir læknisskoðun á Old Trafford.

Tosic er vinstri kantmaður en United hefur þegar náð samkomulagi við Partizan Belgrad um kaupin á honum. Þá hefur hann fengið atvinnuleyfi og verður formlega orðinn leikmaður Manchester United í næsta mánuði.

Tosic er tvítugur og ferðaðist hann til Englands í gærkvöldi eftir að hafa leikið sinn síðasta leik fyrir Partizan. Tosic var hinsvegar ekki einn á ferð því með honum var liðsfélagi hans hjá Partizan, Adem Ljajic.

Ljajic æfði með United fyrr á þessu ári og mun hann einnig gangast undir læknisskoðun á Old Trafford með það fyrir augum að ganga til liðs við Evrópu- og Englandsmeistarana. Ljajic er sautján ára og er einn mest spennandi ungi leikmaðurinn í Evrópu.

Hann mun ekki ganga til liðs við United strax því enska félagið hyggst leyfa honum að leika með Partizan á næsta ári.