Moody´s lækkar lánshæfi ríkissjóðs

Matsfyrirtækið Moody's lækkaði í dag lánshæfiseinkunnir Ríkissjóðs Íslands fyrir erlendar og innlendar skuldbindingar í Baa1 úr A1. Horfur eru neikvæðar.

Þar með hefur matsfyrirtækið lokið skoðun sinni frá 8. október sl. en þá var tilkynnt að lánshæfismatið gæti hugsanlega lækkað.

Lánshæfiseinkunnin fyrir skammtímaskuldbindingar var lækkuð í P-2 úr P-1.

Kenneth Orchard sérfræðingur hjá Moody´s segir í áliti fyrirtækisins að lækkun sé gerð með hliðsjón af því að fjárhagslegur styrkur íslenska ríkisins hefur skaðast verulega sökum banka- og fjármálakreppunnar.

Það hafi svo aftur leitt til þess að stjörnvöld hafi neyðst til að taka umfangsmikil lán sem munu hafa áhrif á afkomu ríkissjóðs í mörg komandi ár.