365 verður Íslensk afþreying

Á hluthafafundi 365 hf. sem haldinn var í dag var samþykkt samhljóða að breyta nafni félagsins í Íslensk afþreying hf. Björn Sigurðsson fyrrum forstjóri Senu verður forstjóri hins nýja fyrirtækis. Fjölmiðlahluti 365 hf. hefur nú verið skilin frá öðrum einingum fyrirtækisins og verður Ari forstjóri þess.

Íslensk afþreying er hlutafélag tveggja eininga, Senu ehf. og EFG ehf. og starfar félagið einkum á vettvangi afþreyingar og skyldrar starfsemi. Gert er ráð fyrir að velta félaganna á þessu ári sé samtals um sex milljarðar króna.

Einnig var á fundinum samþykkt samhljóða að veita stjórn heimild til hækkunar á hlutafé að andvirði þriggja milljarða króna að nafnvirði með útgáfu nýrra hluta.

Á fundinum var einnig samþykkt samhljóða að fækka stjórnarmönnum félagsins úr fimm aðalmönnum í þrjá. Á fundinum voru sjálfkjörin í stjórn Ari Edwald, sem mun gegna stjórnarformennsku, Einar Þór Sverrisson og Lára N. Eggertsdóttir og Hildur Sverrisdóttir sem varamaður.