Slæmar fréttir af Rosicky en góðar af Eduardo

Tomas Rosicky, miðjumaður Arsenal, verður frá vegna meiðsla sinna í þrjá mánuði í viðbót að minnsta kosti. Þessi 28 ára leikmaður meiddist illa á læri og fer í aðra aðgerð í þessari viku.

Rosicky fór fyrst í aðgerð í maí en bati hans hefur verið hægari en reiknað var með. Hann hefur aðeins leikið 61 leik fyrir aðallið Arsenal síðan hann gekk til liðs við félagið frá Borussia Dortmund í maí 2006.

Það eru betri fréttir af meiðslum sóknarmannsins Eduardo en hann mun snúa aftur á völlinn í varaliðsleik gegn Portsmouth 16. desember. Óttast var að meiðsli sem hann hlaut í leik gegn Birmingham 23. febrúar gætu bundið enda á feril hans.