Royal Unibrew ætlar í útrás til austurs

Royal Unibrew, næststærsta brygghús Danmerkur, sér möguleika á auknum vexti á mörkuðum í Austur-Evrópu. Samhliða er ætlunin að skera verulega niður rekstrarkostnað félagsins. Stoðir á rúmlega 25% Í Royal Unibrew.

Berlinske Business birtir í dag ítarlegt viðtal við Poul Möller forstjóra Royal Unibrew. Þar kemur m.a. fram að fyrir utan útrás á markaði í Austur-Evrópu sjái félagið tækifæri tl vaxtar á mörkuðum í Afríku og Karabíska hafinu.

"Mesti vöxtur okkar mun þá verða í Póllandi og Lettlandi ásamt maltölgerðum í Afríku og Karabíska hafinu," segir Möller. "Þetta eru stórir markaðir og ég reikna með vexti sem nemi tveggja stafa tölu á ári á þessum mörkuðum næstu árin."