Guðjón hefur áhuga á að taka við Crewe

Guðjón Þórðarson sagði í samtali við BBC í dag að hann hefði sett sig í samband við forráðamenn Crewe í ensku C-deildinni og lýst yfir áhuga á að taka við starfi knattspyrnustjóra félagsins.

Crewe rak stjóra sinn Steve Holland í síðustu viku og Guðjón hefur áhuga á að taka við af honum.

"Ég hef rætt við menn hjá Crewe. Starfslýsingin þar yrði væntanlega að þjálfa unga leikmenn og að vera góður stjóri. Ég held að ég valdi því," hafði BBC eftir Guðjóni í dag.

"Þegar ég fór frá Englandi á sínum tíma hafði ég ekki sérstakan áhuga á að snúa aftur. Crewe er fínt félag sem lifir af því að ala upp knattspyrnumenn. Það er góð leið til að reka félag og það er ástæðan fyrir því að ég hef áhuga á starfinu," sagði Guðjón, sem stýrt hefur Stoke, Barnsley og Notts County á Englandi.