Aðeins tveir hafa varið fleiri skot en Gomes

Harry Redknapp, stjóri Tottenham, segir að markvörðurinn Heurelho Gomes sé allur að koma til eftir skelfilegt gengi í marki liðsins að undanförnu.

Gomes hélt hreinu um helgina þegar Tottenham lagði Blackburn 1-0 og var það í fyrsta skipti í mánuð sem hann fær ekki á sig mark - og í þríðja sinn á leiktíðinni.

Gomes hefur gert mörg skrautleg mistök í marki Tottenham á leiktíðinni, en honum til varnar má þó benda á að aðeins þeir Scott Carson hjá West Brom og Ross Turnbull hjá Middlesbrough hafa varið fleiri skot í deildinni.

"Það var mjög mikilvægt fyrir hann að halda hreinu. Tony Parks (markvarðaþjálfari) hefur unnið vel með honum og er að stappa í hann stálinu," sagði Redknapp.

Hann virðist enn hafa tröllatrú á Brasilíumanninum þó hann hafi á tíðum verið ansi skrautlegur.

"Ég las hvað Guus Hiddink sagði um hann. Guus er ekkert fífl og hefur reynslu af því að vinna með Gomes. Hann segir að hann sé einn af bestu markvörðum heims. Það er alltaf erfitt þegar menn eru með lítið sjálfstraust, en ég var ánægður með hann um helgina og það var fínt að hann hélt hreinu," sagði Redknapp.