Gamla Kaupþing fær greiðslustöðvun

Héraðsdómur Reykjavíkur veitti Kaupþingi banka hf. heimild til greiðslustöðvunar, í dag 24. nóvember 2008. Að mati skilanefndar bankans var nauðsynlegt að stíga þetta skref til að tryggja jafnræði kröfuhafa í samræmi við íslensk lög og tilskipanir ESB.

Í tilkynningu um málið segir að greiðslustöðvunin veiti bankanum nauðsynlega vernd gegn lögsóknum. Á meðan á greiðslustöðvun stendur mun bankinn halda starfsleyfi sínu að því marki sem nauðsynlegt er til að viðhalda verðmæti eigna bankans.

Greiðslustöðvunin mun einnig veita Kaupþingi svigrúm til áframhaldandi viðræðna við kröfuhafa, með það að markmiði að hámarka verðmæti eigna fyrir alla hlutaðeigandi. Eins og komið hefur fram hefur verið stofnuð óformleg nefnd kröfuhafa. Með greiðslustöðvuninni er stefnt að því að gera áframhaldandi samstarf við kröfuhafanefndina skilvirkara. Ráðgert er að halda annan fund með nefndinni í desember.

Ólafur Garðarsson, hæstaréttarlögmaður, hefur verið ráðinn aðstoðarmaður í greiðslustöðvun. Hann mun starfa með skilanefnd bankans en hún mun, lögum samkvæmt, fara áfram með valdheimildir stjórnar bankans. Markmið hans eru þau sömu og skilanefndar, að varðveita eignir og hámarka greiðslu til lánadrottna.

Greiðslustöðvunin er veitt til kl. 14 föstudaginn 13. febrúar 2009. Aðstoðarmanni bankans í greiðslustöðvun er skylt að boða fund með kröfuhöfum, sem haldinn skal eigi síðar en þremur dögum fyrir lok þess tíma. Greiðslustöðvunin getur að hámarki varað í 24 mánuði.