Wenger: Þeir voru ferskari en við

Arsene Wenger sagði lið Stoke hafa unnið vel fyrir sigrinum á hans mönnum í Arsenal í dag. Stoke vann 2-1 sigur þar sem innköst frá Rory Delap reyndust liðinu enn og aftur dýrmæt.

"Við vorum meira með boltann en við náðum ekki að skapa okkur mörg færi því þeir voru mjög skipulagðir," sagði Wenger í samtali við Sky.

"Við hefðum átt að skora fyrsta markið og fá þá framar á völlinn en þeir spiluðu allan leikinn á síðasta þriðjungi vallarins og nýttu innköstin. Það er ekki auðvelt að verjast föstum leikatriðum þar sem 20 menn eru í teignum. Við vorum andlega tilbúnir í þennan leik en Stoke menn voru ferskari og mjög vel skipulagðir," sagði Wenger.

Robin van Persie var rekinn af velli í leiknum fyrir glórulaust brot og þá missti Arsenal þá Bacary Sagna, Emmanuel Adebayor og Theo Walcott í meiðsli.

"Okkur var refsað grimmilega í dag og rauða spjaldið gerði okkur ekki auðveldara um vik," sagði Wenger.