Landsbankinn óskar eftir gjaldþroti í Bandaríkjunum

Landsbankinn hf. hefur óskað eftir gjaldþroti í Bandaríkjunum og hafa þá allir þrír stóru bankarnir hérlendis óskað eftir slíku. Fara Landsbankamenn fram á að sú greiðslustöðvun sem veitt hefur verið hér á landi gildi einnig um gjörvöll Bandaríkin.

Samkvæmt frétt á Bloomberg fréttaveitunni óskaði Landsbankinn eftir gjaldþroti til að verja sig gegn málssóknum frá kröfuhöfum í Bandaríkjunum meðan á skiptingu þrotbús bankans á Íslandi og í Evrópu stendur, það er, að fá viðurkenningu á þeirri greiðslustöðvun sem veitt var hér á landi. Farið er fram á að sú viðurkenning gildi um öll Bandaríkin.

Við þingfestingu málsins í New York síðdegis í gær kom fram að bankinn skuldar um milljarð dollara eða 113 milljarða kr. í Bandaríkjunum en eigurnar á móti nema svipaðri upphæð.

Kristinn Bjarnason hefur verið skipaður umsjónarmaður þrotabús Landsbankans í New York.