Þekktur fasteignabraskari á bakvið hrun Roskilde bank

Í ljós hefur komið að þekktur danskur fasteignabraskari á stóran hlut að máli þegar Roskilde bank varð nær gjaldþrota í síðustu viku og þurfti neyðaraðstoð frá seðlabanka Danmerkur

Maðurinn sem hér um ræðir er Jörgen "Flexplan" Olsen en hann varð landsþekktur á níunda áratugnum er fasteignafélag hans Flexplan Gruppen varð þess valdandi að Kronebanken varð gjaldþrota. Á þeim tíma var málið kallað fjármálahneyksli áratugarins. Nú hefur komið í ljós að Roskilde bank lánaði Jörgen hundruðir milljóna danskra króna en fékk lítið sem ekkert endurgreitt af þeim lánum.

Í umfjöllun blaðsins Berlinske Tidende í dag um þetta mál er meðal annars rætt við Per Hansen prófessor í viðskiptasögu við Copenhagen Business School. Prófessorinn segir að svo virðist sem Roskilde bank hafa tekið að sér viðskiptavini sem aðrir vildu ekkert hafa með að gera.

Stærsta tap Roskilde bank í viðskiptum sínum við Jörgen "Flexplan" Olsen eru tvær íbúðabyggingar við Fredriksberg sem bankinn mun tapa um milljarði íslenskra króna á. Bankinn hefur að vísu veð í þessum eignum en þar sem fasteignamarkaðurinn í Danmörku er í mikilli niðursveiflu er engin leið að selja þær.