Verðbólgan 14,5 prósent í ágúst

Verðbólgan í ágústmánuði mælist 14,5 prósent eftir að vísitala neysluverðs hækkaði um 0,9 prósent á milli mánaða. Þetta kemur fram í nýjum tölum Hagstofunnar.

Verðbólgan reyndist 13,6 prósent í júlí síðastliðnum og hefur því aukist um tæpt prósentustig á milli mánaða. Hún hefur ekki verið hærri í rúm 18 ár en í júlí 1990 reyndist hún 15,5 prósent.

Þetta er engu að síður litlu undir verðbólguspám greiningardeilda bankanna en þær höfðu reiknað með því að vísitala neysluverðs myndi aukast um 1,1 prósent á milli mánaða.

Verð á bensíni og olíum lækkaði um 3,9 prósent en verð á mat og drykkjarvörum hækkaði um 1,8 prósent. Sumarútsölum er að ljúka og hækkaði verð á fötum og skóm um 4,7 prósent.

Kostnaður vegna eigin húsnæðis lækkaði um 0,3 prósent. Þar af voru áhrif af lækkun markaðsverðs -0,11 prósent en áhrif af hækkun raunvaxta voru 0,05 prósent. Þá hækkaði verð á efni til viðhalds húsnæðis um 6,3 prósent.

Undanfarna þrjá mánuði hefur vísitala neysluverðs hækkað um 2,8 prósent sem jafngildir 11,5 prósent verðbólgu á ári.