Bjartsýnn á að halda Santa Cruz

Sam Allardyce, knattspyrnustjóri Blackburn, er bjartsýnn á að halda sóknarmanninum Roque Santa Cruz.

Paragvæski landsliðsmaðurinn hefur stöðugt verið orðaður við brotthvarf frá Ewood Park síðustu vikur.

Haft var eftir Santa Cruz í fjölmiðlum nýverið að hann vildi ganga til liðs við stærra félag. „Það voru mistök hjá honum að fara í þetta viðtal. Við höfum rætt þessi mál og ég hef látið hann vita að ég vilji halda honum," segir Allardyce.

„Það er ekkert öruggt í fótboltanum en ég er ekki mættur hingað til að selja mína bestu leikmenn," sagði Allardyce. Santa Cruz hefur ekki leikið eins vel á þessu tímabili eins og því síðasta.

Annars er það að frétta úr herbúðum Blackburn að Robbie Fowler hefur yfirgefið félagið en stuttum samningi hans á Ewood Park er lokið.