Gríðarleg aukning innlána hjá Byr

Ragnar Z. Guðjónsson forstjóri Byr segir bankann hafa fundið fyrir gríðarlegri aukningu á innlánum eftir hrun stóru viðskiptabankanna þriggja. Hann vill ekki gefa upp neina tölu í því sambandi en segir mikið af nýjum viðskiptavinum hafa komið til Byr undanfarið.

„Ég get nú ekki tjáð mig um neina tölu í þessu sambandi en það hefur verið fínn gangur í þessu hjá okkur sem við sjáum meðal annars í auknum innlánum," segir Ragnar.

Heimildir Vísis herma að aukningin sé nálægt 60 milljörðum króna en Ragnar segir þá tölu vera í hærri kantinum.

Í dag var einnig sagt frá viljayfirlýsingu Byrs, Sparisjóðs Keflavíkur og Spron um hugsanlega sameningu. Ragnar segir þær viðræður vera á byrjunarstigi og lítið um þær að segja annað en að menn hafi ákveðið að kanna hugsanlegan grundvöll fyrir sameiningu.

Aðspurður hvort viðskiptaráðherra hafi farið þess á leit að bankarnir sameinist segir Ragnar það ekki rétt.

„Þetta kemur upp úr viðræðum sparisjóðsmanna vegna breyttra aðstæðna á fjármálamarkaði. Það er ekkert nýtt að sparisjóðir séu sameinaðir, Byr er til dæmis samansettur úr fjórum sparisjóðum sem sameinaðir voru á síðustu tveimur árum," segir Ragnar.

Hann segir þetta vera þróunina á Íslandi sem er í takt við það sem er að gerast erlendis. „Þetta eru litlar einingar og það er nauðsynlegt að þær séu stærri."