Ince: Það er fólk sem hlakkar yfir óförum okkar

Paul Ince hefur legið undir gagnrýni að undanförnu enda hefur Blackburn leikið níu leiki án sigurs og situr í 19. sæti ensku úrvalsdeildarinnar. Ince tók við knattspyrnustjórastöðunni hjá Blackburn síðasta sumar.

„Það er ákveðið fólk sem vill liðinu allt það versta. Það vill að okkur mistakist, töpum leikjum og höldum okkur ekki í deildinni. Það ætti að vera nóg hvatning fyrir mig og mína menn. Við viljum afsanna þetta," sagði Ince.

„Þegar það gengur ekki nægilega vel þá er neikvæðnin óumflýjanleg. En við erum aðeins fjórum stigum á eftir Manchester City og þeir hafa eytt 50 milljónum punda í að styrkja liðið. Tottenham, Newcastle og Sunderland eru á svipuðum slóðum. Allt lið sem hafa eytt miklu."