Aflaverðmætið jókst um 7 milljarða kr. milli ára

Aflaverðmæti íslenskra skipa nam 70 milljörðum króna á fyrstu níu mánuðum ársins 2008 samanborið við 62,8 milljarða kr. á sama tímabili árið 2007.

Aflaverðmæti hefur aukist um um 7,2 milljarða kr. eða 11,4% á milli ára. Aflaverðmæti í september nam 6,7 milljörðum kr. miðað við 4,4 milljarða kr. í september 2007.

Fjallað er um málið á vefsíðu Hagstofunnar. Þar segir að aflaverðmæti botnfisks janúar til september 2008 nam 49,3 milljörðum kr. og jókst um 5,1% miðað við sama tímabili árið 2007. Verðmæti þorskafla var 23,4 milljarðar kr. og jókst um 1,2% frá fyrra ári.

Aflaverðmæti ýsu nam 11,5 milljörðum kr, jókst um 9,8% og verðmæti karfaaflans nam tæpum 5 milljörðum kr. sem er sambærilegt við sama tímabil árið 2007. Verðmæti ufsaaflans jókst umtalsvert, nam 4,4 milljörðum kr. sem er 41,8% aukning miðað við fyrstu níu mánuði ársins 2007.

Verðmæti flatfiskafla janúar til september nam 4,5 milljarði kr. og jókst um 27,9% frá fyrra ári. Aflaverðmæti uppsjávarafla nam 15,2 milljörðum sem er 31,4% aukning miðað við fyrstu níu mánuði ársins 2007. Verðmæti síldaraflans janúar til september nam rúmum 6 milljörðum kr. sem er 120,7% aukning frá sama tímabili árið 2007. Verðmæti makríls jókst einnig mikið á milli ára, nam 4,6 milljörðum kr. samanborið við 1,6 milljarð fyrstu níu mánuði ársins 2007.

Verðmæti afla, sem seldur er í beinni sölu útgerða til vinnslu innanlands nam 27,5 milljörðum króna sem er aukning um 3,7% frá fyrra ári. Verðmæti afla sem keyptur er á markaði til vinnslu innanlands dróst saman um 5%, nam 9,7 milljörðum kr. fyrstu níu mánuði ársins. Aflaverðmæti sjófrystingar nam 22,2 milljörðum kr., jókst um 22,2% og verðmæti afla sem fluttur er út óunninn nam 8,4 milljörðum kr. sem er 30,3% aukning frá sama tímabili árið 2007.