Aðsókn minnkar á Englandi

Áhorfendum á leikjum í ensku úrvalsdeldinni hefur fækkað um hátt í þúsund að meðaltali á hvern leik á þessari leiktíð samkvæmt úttekt Daily Telegraph.

Áhorfendum hefur fækkað mest hjá Newcastle United þar sem fækkað hefur um 4,631 áhorfanda á hvern leik í úrvalsdeildinni. Fækkað hefur um ríflega 3,000 hjá grönnum þeirra í Sunderland og fækkunin var um þúsund manns hjá Everton, Wigan og Blackburn.

Á síðustu leiktíð var meðaltal áhorfenda í efstu deild það hæsta í hálfa öld eða 36,076 áhorfendur á leik, en sú tala hefur lækkað um næstum þúsund manns.

Reyndar hefur það áhrif á þessa tölu að leik Manchester United og Fulham í ágúst var frestað vegna þátttöku United í ofurbikarnum.

Kreppan hefur ekki farið framhjá forráðamönnum United á leiktíðinni, því samkvæmt heimildum Telegraph hefur enn hefur ekki tekist að fylla Old Trafford og þau 76,180 sæti sem völlurinn tekur.

Þegar England er skoðað í heild sinni kemur fram að aðsókn hefur minnkað á leiki í úrvalsdeildinni sem og í C- og D-deildinni, en reyndar hefur aðsóknin aukist í Championship-deildinni, eða B-deildinni.

Liverpool og Everton hafa þegar riðið á vaðið og lækkað miðaverð hjá sér og ekki er útilokað að fleiri úrvalsdeildarklúbbar geri slíkt hið sama.