Gullknötturinn: Messi tippar á Ronaldo

Argentínumaðurinn Leo Messi og Portúgalinn Cristiano Ronaldo eru almennt taldir líklegastir til að vinna gullknöttinn eftirsótta í næsta mánuði.

Gullknötturinn er verðlaunagripur sem franska tímaritið France Football afhendir knattspyrnumanni ársins á hverju ári.

Flestir hallast að því að Ronaldo hjá Manchester United hreppi verðlaunin að þessu sinni, enda átti hann stórkostlega leiktíð. Barcelona-maðurinn Messi er ekki ósammála því.

"Gullknötturinn er mikilvæg athöfn. Ronaldo vann meistaradeildina og ensku úrvalsdeildina og því á ég von á því að hann fái gullknöttinn," sagði Messi fyrir leik Barcelona gegn Sporting í heimalandi Ronaldo.