„Þetta snýst um jafnræði hluthafa“

Vilhjálmur Bjarnason formaður félags fjárfesta og hluthafi í Straumi-Burðarás fjárfestingarbanka hefur höfðað mál á hendur bankanum ásamt dætrum sínum. Þau eru öll hluthafar í bankanum og telja að jafnræðisreglan hafi verið brotin með sölu stjórnarinnar á 550 milljónum hluta í bankanum á gengi sem var undir markaðsgengi. Vilhjálmur fer fram á 30.000 krónur skaðabætur.

„Málið snýst um grundvallaratriði í félagarétti um mismunum hluthafa. Hvort þeir hafi átt rétt á því að kaupa þetta á sömu kjörum og þessi einstaki hluthafi," segir Vilhjálmur í samtali við Vísi.

Hann segir málið fyrst og fremst snúast um jafnræði hluthafa og bendir á að ef það eru þúsund litlir hluthafar sem fara fram á sömu skaðabætur séu það samtals 30 milljónir fyrir bankann.

Í málinu stefna Vilhjálmur og dætur hans Björgólfi Thor Björgólfssyni, Birgi Má Ragnarssyni, Guðmundi Kristjánssyni, Friðriki Hallbirni Karlssyni og James Leitner auk bankans.

Aðspurður um upphæðina sem farið er fram á í skaðabætur segir Vilhjálmur hana grundvallast af eignarhluti sínum og hlutdeild í því sem farið er á mis við. „Um það snýst félagaréttur, þetta snýst um jafnræði.“